PATHIAN THINLUNG MISSION

                         

                                  Alex Lalagent Thanga 

            Kum 2014 September thla chu kar lovah a lo inher chhuak ve leh ta reng mai, MMC/F in kum tina kan lo hman \hin, Mission Pual Thla a ni tih ka hriatin ka lawm hle mai. Chu mai ni lovin MMC/F rawngbawltu Clerk in Mission lam hawi article ziak tura kei teh meuh mai phone a\ang min rawn sawm ser ve hi ka lawm tak zet a ni. He article chhiartu zawng zawngte Lalpan ‘Mission thinlung’ pe che u rawh se.

            Kan Bible Genesis a\ang a, Thupuan thleng hian Mission idea hi a khat vek mai a, kan Pathian hi “Mission rawngbawlna ngai pawimawhtu Pathian a ni” tih chiang takin kan hre thei a ni. Mi tam tak chuan (Mtt 28:19-20, Mark 16:15) a kan hmuh angin Mission rawngbawlna hi Lal Isua thupek ropui (great commission) ah chauh kan ngai a, thu dik tak pawh a ni awm e. Amaherawh chu Mission rawngbawlna hi Lal Isua he khawvela a lo kal hma daih a \ang tawh khan Lalpan thawk turin thu min lo pe tawh. Sam 96:3 ah chuan “Hnam tin zingah a ropui zia hril u la, mitin rengte zingah a thil mak tih te chu hril rawh u.” Sam 96:10 “Hnam tin zingah chuan, Lalpa chu lalah a \hu, ti rawh u.” Sam 105:1 “Aw Lalpa hnenah lawmthu hril ula, a hminglam rawh u, mitin zingah chuan a thil tih te chu hriat tir rawh u.” Isai 12:4b “…A thil tih te chu mitin zingah hriattir ula, a hming chu chawimawiin a awm tih hriattir rawh u.”

            Ka rilru khawih em emtu, Rev. Lai Lian Thanga thu ziak pakhat chu, “Mission hna kan thawk lo a nih chuan keimahni ngei hi Mission field-ah kan chang leh ang” tih hi a ni. Chuvangin kan Pathian hi Mission rawngbawlna ngaipawimawhtu Pathian a ni a, keini ringtute hi a fehchhuaktu tur leh a thawktu tur a te chu kan ni. Mission hnathawk turin Lal Isuan, A lei taksain min awmpui tawh lo va, nang leh kei kaltlangin he hna hi thawh a \um tawh zawk a ni. Mission rawngbawlna ngaipawimawh lotu/ngaihthahtu chuan Pathian thupek a ngaipawimawh lo tihna a ni ang. Hei vang tak hian a lawm kan Missionary ropui, “The father of Modern Mission” (Thangtharte Mission paber) ti a, TITTLE an pek, India ram nawrengtu, Willliam Carey chuan “Mission hi Pathian thinlung a ni” a lo ti tawp mai a ni. Mission hna ai a, hna ropui hi a awm ang em aw ka ti fo \hin. Mission hnathawk ramtina kala, Chanchin Tha hriltu (Missionnary) nitur chuan Lalpan koh bik a nei tih erawh kan hriat a pawimawh hle. Amah erawh chu vawinah hian thilpek hmangin emaw, tawngtaina hmangin emaw, he Mission hnathawktur hian Lalpan a ko a che. Chanchin \ha feh chhuah puiturin I ke lo chu Lalpan ke dang a nei lova, Chanchin tha hril turin I ka lo chu Lalpan ka danga nei lova, Missionary chawmturin I kut lo chu Lalpan kut dang a nei lo. Mission hna hi nang leh keiin kan thawh loh chuan tunge thawk ta ang le? Mission rawngbawlna a tel ve turin Lalpan kawng min hawn sak phal ve hi kan Pathian ropui rawh se.