Kohhran leh a rawngbawl hnate

Alex Lalagent Thanga

            Malaysia zofate dinhmun kan en chuan KOHHRAN tih thumal hmangin kan ding lova, pawl (denomination) hrang hrang atanga inchhungkhawm kan ni a, Kohhran inrelbawl dan anga kal tho siin, INPAWLHONA (Fellowship) tih hming puin kan awm a ni a, hei hi dik pawh a dik viauin a lang. Ama’rawhchu he article-ah chuan Fellowship tih hming chawi lovin KOHHRAN tih hming kan vuah zawk dawn a ni. “KOHHRAN” tih thumal han zirchian (study) chuan a hman theih tho turah pawh ngai ila, a tha awm e.

            Kohhran chu Lal Isua din a ni a (Mat. 16:18), Krista taksa phochhuaka, a thiltih a piangah Lalpa ropui nana tia (1 Kor. 10:31), Pathian chawimawi tura din a ni. Kohhran nihna leh rawngbawlna hrang hrangte chuan Pathian a tiropuiin a chawimawi tur a ni. Kohhran rawngbawl hna thenkhatte lo zirho dawn ila:

(1) Hruaitu leh Kohhran enkawlhna

            Thuthlung Hlui-ah chuan Israel lalte’n Pathian inpuanchhuahna kaltlangin ro an rela, mipuite an hruai thin. Chu tak mai chu THEOCRACY (Pathian rorelna/ lalna) kan tiha chu a ni. Thuthlung Thar Kohhran pawh Rom sawrkarna hnuaia bul intan leh seilian a ni a, he mi avang hian Rom sawrkarna kalphung chhawmin Kohhran hruaitu hna leh chanvo pawh inpek an lo ching cho ta a ni. Ephisi Kohhran chuan Upa te neiin, upate chuan Kohhran hruaitu hnate an chelha, Kohhran an enkawl a ni. Philipi Kohhran pawhin hotute leh rawngbawltute a nei ve bawk. Hruaitu hnate hi pawimawh tawpkhawk a ni a, hruaitu atana Lalpa mi ruatte hi Kohhran ta an ni a, Kohhran erawh chu hruaitute ta a ni lo. Lal Isua nungchang leh rawngbawlna entawntute an ni tur a ni a, chhiahhlawh anga inngaitlawm taka rawngbawl tur an ni. Lal Isua, lei leh van lal ber meuh pawh Bawihah a insiam a, amah leh amah a intitlawm angin he Krista rilru hi Kohhrante chuan an pu tur a ni. Kohhran member-te’n thlarau lam thilpek an dawn ang zela rawngbawltir hi hruaitute tih tur pawimawh tak a ni. Hruaitu nih duh vanga beia, tlingte hian kohhran member-te tisa leh thlarauva tuihalna engtikah mah an phuhru ngai lo vang. Chung mite chuan Lal Isua hnathawh ai anmahni hnathawh an chhuanga, dikna aiin an duhna an laltir zawka, Lalpan ropuina a chang ngai lo. Lal Isua rilru tel lova Kohhran hruaitu nih chu mahni tan leh midang tan chhiatna a thlen thin (Phi. 2:5-11).

(2) Thuhril leh zirtir

            Pathian thunung puanchhuah hi Kohhran rawngbawlna pawimawh tak a ni a, Thuthlung Hlui hunah chuan hrilhlawkna thu puanchhuah (prophecy) leh Pathian Lehkha Bu chhiarchhuah (Scripture reading) deuh chauh hi thuhrilah ngaih a ni. Thuthlung Tharah erawh chuan Lal Isua Chanchin Tha puanchhuah hna a tel tawha, chu chu ringlo mite hnenah puangchhuak tura tih a ni deuh ber mai. Nimahsela, hun a lo kal zela ringtu pungkhawm zinga thuhril a pawimawh tho avangin, Evangelist hming hialte pawh inputtir-in Chanchin Tha hrilh hna kan chhawmnung zela, chu chuan thu hril pawimawh zia a tilang chiang hle awm e.

            Zirtir pawh hi Kohhran hna pawimawh tawpkhawk a ni leh a, Lal Isua thupek ngei pawh a ni (Mat. 28:19-20). Zofate hi tunlai Harhtharna hian min nuai nasa em em mai a, a that em em rualin, Berea khuaa ringtute angin Bible-ah a awm em? Kan thuhriltu thu sawi hi Bible min zirtir dan a ni em?tiin Bible kan chik/zir ching lo thin erawh chu a pawi hle. Sakhaw mi leh pathian mi kan hriathran loh avangin a inla muk peih peih mi tak leh tha emaw kan ti a, Thlarau Thianghlim kan dawn ve te lah hi a thianghlim lo thei khawp a, Thlarau Thianghlim-a khat te nun kan hmuh tum dan pawh nu deuh but but a ni zel. Chuvang chuan Bible-a Pathian thupuan chhuah zawng zawngte hi dik tak leh a nihna ang taka hrethiam tur chuan zirtirna ka mamawh a, zirtirnaah pawh zirtirna dik leh belhchian tlak a ni tur a ni.

(3) Tawngtaina leh dilsakna

            Pathian hnena tanwgtai leh midangte tana dilsak hi Lal Isua nun atanga Kohhranin a lakchhawn a ni a, Lal Isua tawngtaina chuan Pa Pathian leh amah (Lal Isua) inkara insawmna thuk tak a tarlang angin, Kohhran mi thianghlimte tawngtaina chuan Pathian nung nena kan inzawmna duhawm tak a tarlang ve bawk a ni. Lal Isua nun kha tawngtai nunin a khata, a zirtirte meuh pawh tangtai dan tur a zirtir a nih kha! Tawngtai pawimawh zia chu sawinawn ngai lovin kan hre theuh tawh awm e. Midangte tana tawngtai leh diksak pawimawh zia tarlangtu chu THlarau Thianghlim-in min dilsak leh tanwgtaisak hi a ni (Rom. 8:26-29). Chuvangin tawngtaina hi Pathian direct-a kan biak theihna awmchhun a ni a, kan chhungkaw member-te zinga tuemaw kan biak leh kan kawm anga, lei leh van siamtu Pathian nung kan pawl theihna kawng awm chhun pawh a ni. Kohhran chuan hei hi hna pawimawh tak a ni tih a hre reng tur a ni a. MMF member-te he ti khawpa Lalpa malsawm kan dawnna chhan pawh Pastor Head Quarters-ah tawngtaina maicham chawl lova kan neih vang a ni ngei ang.             
Kohhran rawngbawl hna chu a zau em a vangin kan sawiseng lo anga, Chanchin Tha nena inmil-in khawvel mite hnena ram la zel turin Lal Isuan min beisei a ni, tih erawh kan hriat a tha ang. Lal Isua a thisen thianghlim hmangin a Kohhran a din a, Apostol-te’n an thisen hmangin hmun hrang hrangah KOhhran an phun bawk a, keini hunah teh hian thawhrimna leh insensohna tel lovin Kohhran kan din ang tih a va hlauhawm em! Davida inpekna hi hre reng ila, “Engmah insengso lovin, Lalpa ka Pathian hnenah halral thil hlante ka hlan tawp lo vang” (2 Samuela 24:24).