MEETING KAIHHRUAI DAN

Alex Lalagent Thanga 

            Kar hmasaah khan “Meeting Minutes Ziah Dan” kan zirho tawh a, tun tumah chuan “Meeting Kaihhruai Dan” kan zirho leh dawn a ni. Ziaktu ziah chhan leh thahnemngaihna lam chu kan sawi zau vak tawh lo mai ang a, thuhma pawh nei hran lovin kan thupuiah kan lut chawt tawh mai  ang.

            Pawlho (Fellowship), Insuihkhawm (Association), Kohhran (Church) etc., chakna hnar leh innghahna bulpui ber chu Pathian a ni a, chu bakah hruaitute meeting-na hi a ni. Chuvangin, meeting tan hmain hunserh (devotion) neih hian committee boruak a vawng tha a, hunserh hmangtu hian a theih hram chuan, rorelna lam hawi deuha thuchah/sawi a fuh duh phian. Committee rorelna hi pawlho inkaihhruaina leh inkaihhruaidan lo chhuahna hnar (source) ber a ni a, kan thurel ang zelin pawlho chuan hma a la thin. Chuvangin rorelna hi a pawimawh em em a ni. Rorelna kaihruaitu chu “CHAIRMAN” ti a koh a ni a, kaihhruaitu chu pawlho zinga lu ber, PRESIDENT emaw, DIRECTOR emaw, SUPERINTENDENT emaw, etc., an nih laiin PASTOR pawhin a kaihruai thei tho. Chuvangin he article-ah chuan meeting kaihruaitu ti lovin “chairman” tih kan hmang dawn a ni.

            Tirhkoh Paula’n, "Kohhran hruaitu atan ringthar mi a ni tur a ni lo," a lo tih hi a belhchian awm hle mai. Vawi khat chu, khaw pakhat Kohhran thalai hruaitu (president) atan mi piangthar hlim, mi phur tak mai hi an thlang a; kum chanve velah chuan a lo chin fo thin zu hmunah a lo petek leh zauh thin a, sumkawltu cheng pawh a lo tichingpen hman a, an thlak leh vat a ni. Hruaitu lu chuan department pawisa (sum) hi khawih tam vak lo se a him ber.

Chairman hriat tur thenkhatte:

            Meeting hi chairman leh secretary inberawna koh thin tur a ni a, chairman-in secretary rawn lova meeting duh duh huna kan sawmtir fo mai hi dictatorship a nih mai bakah ram rethei a sipaiho tih tawk lek a ni. Chairman hian meeting koh hun hi thlan uluk a pawimawh hle bawk, meeting hun a zirin member-te kan kal thain, kan kal tha lo thei a. Hun thawl tha leh ngaihtuahna fim tak hman theihna hun tur thlan thiam a tul (emergency meeting erawh a huam lo). A theih hram chuan hun bituk saa tan ngei tur a ni a, kal tlai hi inuanna tur a ni lo tih hriat reng a tha. Agenda hi chairman-in ziaktu (secretary) a hrilh hre ngei ngei tur a ni a, secretary pawhin committee sawmnaah a tarlang ngei tur a ni. Secretary-in a hriat loh tlat chuan agenda a tarlan tur a nei lo thin. Meeting-na hmuna member-te’n an hriat chauh chuan agenda ngaihtuah lawkna hun an nei lo thin a, rorel pawh a sawt thei lo.

            Chairman chu hun vawngtu a ni a, rorel hun chhung rei thin lutuk hi member-te’n kan nin thin avangin, agenda pakhat chai chhung a rei lutuk loh nan, hun vawn (control) dan thiam a pawimawh em em a, mi pakhat vawi hnih/ thum aia tam din tir loh hram a tha. Mimal/pawl tanpuina thilpek emaw, interview emaw, hlawh chungchang emaw kan relin, banphara vawt hi a tha lem lo. A ban pharte chhinchhiah a awl thin a, inhmaizahna a nâa kan duhna zawn takah kan phar ngam loh thin avangin, secret ballot vote lak thin hi a him ber fo. Chairman chuan țhu chungin meeting kaihruai sela, boruak sat hunah emaw, thil pawimawh zualah chauh rawn ding chhuak thin sela; chu chu boruak vawngtu tha tak pakhat a ni. Chairman-in ding chunga meeting a kaihhruai hi a tha viau thova, mahse committee member zing atanga ngaihdan leh rawtna sawi duh an awm hian an din thin avangin chairman tan țhut a tha ber. 

            Chairman chu Meeting thlarau vawngtu ber a ni a, rilru thianghlim tak pu mi anih mai bakah mi insum thei tak a ni tur a ni. Chairman ber a thinrim fo chuan boruak a sa phat thin a, ngaihtuahna fim a hman theih loh. Mahni ngaihdan aia mi tam zawk ngaihdan a pawimawh zawk a ni tih hriat mai hi a tawk lova, chairman-nihna atanga boruak hai a, mahni ngaihdan sawimawi phet tum hi a fin loh thlak hle. Chairman chuan a ngaihdan a sawi ve vak tur a ni lova, mi dangte ngaihdan a khawnkhawm thiam tur a ni. Chutih rualin awnlam neiin meeting a kaihruai tur a ni lo a, member-te a thunun thiam tur a ni. Chairman thukhawchang ngah lutuk hi member-ten chhangban khamin an kham duh phian. Rawtna chi hrang hrang a awm-in, member junior deuhte rawtna kan palzam duh mai thin hi thil tha lo tak a ni a, chin tam loh a tha. Rawtna puitling a nih phawt chuan tawmpuitu zawn a, vote lak thin tur a ni. Chairman chuan a thu thu in agenda a siamin, member dangte atanga agenda lo lut a hmetmit tur a ni lo. A.O.B hi saptawng “Any Other Business” tihna a ni a, chu chu “tuldangte” tihna mai a ni. Agenda-a tel lemlo member-te’n eng emaw rel ngai dang an neih takin tia dah thin a ni a, committee apianga dah tur a ni hran lo. “A.O.B” ti lo hian “tuldangte” ti a dah mai hi member-te’n kan hrethiam zawk awm e. “Tuldangte” ti a agenda lo lut chu agenda puitling a pawm theih a ni. A zau thei ang berin member-te ngaihdan a khawn khawm tur a ni a, member zakzum leh ngawichawi deuhte a fuih thiam a pawimawh bawk.

            Meeting rorelte bawhzui chungchangah hian chairman chauh ni lovin Committee member zawng zawng te an pawimawh a, abiktakin Meeting-in mawhphurhna a pekte chu an inthlahdah tur a ni lo. Mahni bawhzui theih loh tur chu rel loh mai tur a ni. Kan bawhzui a nih pawhin mahni rilrem zawng (meeting rel ang ni chiah lo) a lo namnuai mai hi a fuh lo duh chawk! Meeting thuchhuak anga thil a kaltluan theih loh pawhin Office Bearer (O.B) te rawn (hrilhhriat) ngei tur a ni.

Committee member-te hriat tur:

            Meeting kaihruaitu chu chairman a ni a, chuvangin a hriatpuina leh remtihna chauhvin member-ten ngaihdan an sawi thei a ni. Member tu pawhin a ngaihdan a sawi dawnin chairman a hrilh (address) hmasa phawt tur a ni a, “Pu chairman” ti a koh thin tur. Hei hian meeting boruak a ti puithuin, a tizahawm thin. Chairman au hmasa lova sawi ve ngawt chu thu tlinglova ngaih theih a ni. Tin, ngaihdan sawia kan dinin tawifel tak, kim si a sawi tum tur a ni. Agenda kan chiang lo anih chuan zawh hreh loh tur. Agenda ni lo sawikual chiam hi thil tih loh tawp tur a ni a, meeting hmain agenda kan lo zirlawk thin tur a ni.

            Pawl thatna tura ngaihtuahna hmang tur kan nih angin kan ngaihtuahna uluk takin kan hmang tur a ni. Tu ngaih dan mah hi tha/dik ber leh tha lo ber a awm chuang lova, ngaihtuahna sengin kan ngaihdante fiah felfai taka sawi tur a ni. Ziaktu pakhat chuan, “committee member ngaihdan engmah nei lo chu member pawh ni tlak a ni lo” a ti hial a, chuvangin meeting kan kalchhan hriain kan thusawi hi member tam tak aw (voice) a ni tih hriat a tha hle bawk. Kan thu ngaihtuah-ah midangin a rawn sawi kha kan ngaihdan chiah a lo nih chuan sawi nawn duah lovin, “ka hma ami chumi kha mi sawi kha tha ka ti, ka thlawp e,” tih mai hi a tawk viau.

            Tin, Kan thurel chu kan duhdan leh ngaihdan zawng a relthluk a nihloh pawhin rilru puitling takin, Pathian ruat a ni tia pawm ngam tur a ni a, rilru hahdam taka pawm theih tur a ni. Midang thu sawi kan pawm loh zawng a awm a, kan hnial duh anih pawhin “a tha viau a, mahse” tia sawi hi a dawngsawngtu tan a nuam a, hman hram a tha.

            Meeting hi nawmnah (nuamsa) taka telna tur a ni lova, rilru leh ngihtuahna tak tak hman tur a nia, kan awmdan leh incheina thlenga uluk leh fimkhur a tha, hei hi rilru leh ngaihtuahna vawngtu pawimawh tak a ni. Agenda tina ngaihdan sawi ve zel hi member-te’n min ei vak lo thin bawk. Pawlho hi ka pa ro tak emaw tia ta neiha nei te kan awm chawk. Hruaitu kum eng emaw zat pawh lo thawk tawh mah sela mahni duh dan chauh kal pui ngut ngut tum tur a ni lo. Pawlho hian min ta (nei) zawk se a him zawk fo. Thenkhat hruaitu thahnemngai tak phei chu, kan thahnemngaih luatna a over hian, kan rawngbawlpuite kan phutna a sang a, thlarau lamah kan hmu ro duh mai thin a; chuvangin, mite huat leh mite kham nih kan hlawh hlauh duh. Pawlho hmangaih viau ai chuan Pathian hmangaih viau zawk ila, kan hahdam mai a ni.

Tlangkawmna:

            Rorelna hmunah hian, mimaltinte kan mizia a lang sam duh khawp mai. Keimah anga mi thinchhe tan phei chuan din tam loh a tha zawk. Kei pawh meeting ka la kal tam lo viau nan ka chesual (tawngsual) fo. Engpawh chu nise, he article hi ka thalai pui MMCY member lo ni tawh te, la ni mek te leh lo la ni zel tur te tan Krista Isua hmingin ka hlan e. Siamrem ngai leh belh duh te kan neih chuan comment-na lamah kan thawh ho zel dawn a nia. Chhiartu zawng zawng te Pathianin malsawm che u rawh se.