Meeting Minutes Ziah Dan

Alex Lalagent Thanga 

            A thupui atang reng hian ka cho rual loh a ni a, kei teh meuhin a Meeting Minutes Ziahdan tih thupui hmanga article ka han ziak tur chu ka huphurh hle a, mahse “ka ziah si loh chuan tunge ziak bik chuang ang le?” tiin ka inhnem chawp a, kum naupang tak leh meeting pawh la thu tam lo hle hian ka thlirna tukverh zimte atang hian ka han thai kual ve leh a ni e. Tv. Lalpanliana (MMC/F Clerk) hian ziak tura min REQUEST pawh ka ni hran lova, keima’n ka vei ve em a vangin inthlahrung taka ziak mai zawk ka ni. MMC/F secretary dinhmun atangin secretary chanvo leh mawhphurhnate chauh ka rawn tarlang ngam ang a, Meeting kaihhruai dan leh Committee member-te mawhphurhna erawh chu tarlan a ni lo.

Minutes pawimawhna: 

            "Minutes" kan tih te, "Journal" kan tihte hi a ziak dan thu-ah a dik ber tih tura dan leh ramri kham a awm chuang lo va, tuna kan thu ziak tur hi secular lam atanga thlir chuan a danglam deuh mai thei a, engpawhchu nise Academic thlirna kotlang atanga thlir chuan a tam zawk chu inang turah ngai phawt mai ila, a tha awm e. Tuna kan tarlan tur pawh hi a dik ber leh tha ber a ni lo tih chu thil chiangsa a ni. Mi tin hi tawngkam kan hman thiam dan a inang lo ang bawkin kan thu phuah dan pawh a inang lo ngei ang. Ziaktu thahnemngaihna erawh chu, "University/ College-a zir chhuak (degree holder) ni si, atak rama tawnhriat (experience) la nei lo ka thalai puite kaihhruaina atan, zirna runa zir ve lote inchherchhuah nan leh mahni inenfiahna atan” tih a ni.

            Upain," Unau thawnthu sawi dan pawh a dang e," an lo tih thin angin thu hi kaa sawi ngawt chu boruakah a zam ral a, a hnuah sawi leh dan a inang lo fo thin. Patmos thliarkara Johana hnena thil lo thleng tur thuruk Pathianin a hriattir dawn pawh khan lehkhaa ziak turin a tir a nih kha. Nupa inthen tam tak pawh hi an chungchang han tihfel dawn tak tak chuan, "Min ma" tih leh, "Ka ma lo che" tih hi thu buai lian takah a chang fo thin. A chhan chu ziaka thu dah thlip thlep a awm loh vang a ni fo. Chutiang bawkin pawlho (Fellowship) emaw, insuihkhawm (Association) emaw, kohhran (Church), etc,. a lo dinin rorel leh sawiho tul thil a lo awm thin a, mizia leh ngaihdan inang lo tak takte, rorelhona a nih avangin thu tihtlukna chu ziaka fel taka dah a tul thin. Chutianga rorelhona thu tlukna ziaka lo chhinchhiah chu “Minutes” kan tih tak pawh chu a ni a. Pawlho tam berah chuan SECRETARY hna a ni thin. Chuvangin secretary chu thinlung thianghlim tak pu mi a ni tur a ni.

Ziaktu mawhphurhna leh hriat tur pawimawhte:

            Rorel minutes ziah dan leh a ziaktu mawhphurhnate kim chang tak leh tha tawkin pho chhuak thei lo mah ila, a tlangpui pawimawh zual han tarlan tum ta ila:

(1) Ziaktu (secretary) chuan rorel thu tlukna siamna turah zalen takin vote a pe thei a, a pe ngei tur a ni (vote pe lo, Neutral-a awm hi mi dawizep thuamhnaw a ni).

(2) A tul hle loh chuan sawihonaah inrawlh tam lutuk lo se a tha. A minutes ziak a tifel lo thei a ni.

(3) Rorel minutes chu rorel zawhah kim takin a chhiar chhuak ang a, a ziak ang anga chhiar tur a ni. Chhiar paha ziah loh dana tawngkam her rem tur a ni lo. Nemngheh a nih hmain siam that ngaite a siam rem ang a, pawm a nih hnuah leh hming ziah (sign) hnan a nih hnu chuan engmah a tidanglam tur a ni lo.

(4) Thu chu beng lut nuamzawng (a dengkhawng lo zawng)a ziah tum hram hram tur a ni.

(5) Thu ziak chu mahni tawng (roreltute tawng hman) a ziah a tha ber a, hnam dang tawng tel lova ziah fiah theih tum hram a tha. A tul hle a nih pawhin a sawi fiah nan braket ( ) chhunga dah tur a ni.

(6) Thu tlukna chu a nihna ang taka ngaihnuam tak si, tlang taka ziak tur a ni. Pehhel kual vak tur a ni lo. Entirna pakhat han tarlang ila, "Keini MMC chuan kan member zinga mi, thi an awm chuan ralna cheng  Rm-8,000 (sang riat) pek ni se" tiin kan rel a. Ziaktu chuan , "MMC member zinga mi chhiatna tawk an awm chuan" tiin a lo ziak a. Vanduai thlak takin kan member pakhat in (house) a kang hlauh mai a, thenkhat chuan, "Hei aia chhiatna tawk an awm chuang lo" an ti a. Thenkhatin “mitthi chauh a ni kan rel ni" an ti bawk a. An buaina chu thu a nihna ang taka ziak lova, a pehhelna chuan buaina a tichhuak ta a ni. Chuvangin ziaktu  chuan tlang taka ziah tur a ni.

(7) Kan thu ziak chu nakin kum tam tak liam hnu, rorelnaa tel ve lote pawhin an chhiara an hriat thiam/fiah theih tura ziah tur a ni a, tawi kimchang taka ziak a tha ber a, amaherawhchu tih tawi tum luat vanga a fiah dawn loh ai chuan a seiin pawina a nei lo zawk.

(8) Rorel thu tihtawpna thu inang vek hman hi a dik lohna sawi tur chu awm lo mah se, a lo ngaithlatu tan beng a kham thei a, chuvangin a remchan dan angin tawngkam thlak thin tur a ni. Entir nan- thu tawp apianga, "nise tha kan ti" ti vek loin, "rem kan titlang; kan duh tlang; a ni ang; ruat a ni; thlan a ni; kan ruat; kan thlang; etc,." tiin.

(9) Ziaktu chu ziak leh chhiar a thiam tha tur a ni.

(10) Ziaktu (committee member-te pawh a huam) chuan Meeting hun chhunga mimal inhnialna emaw, thu inchuh emaw, member-te thu sawi reng reng hmun dangah a sawi tur a ni lo. Hei hi committee mawngpawp kan tih fo kha a ni. Meeting thu tlukna (thu passed) chauh a sawi tur a ni.

(11) Ziaktu hian Agenda a thawh ve thei a, meeting sawmnaah pawh tarlang thei se duhthusam a ni.

(12) Meeting kaihruaitu hian rorel thu hlaah tihhmaih a nei thei a, ziaktu hian a hrilh (puibawm) thin tur a ni.

Minutes ziah dan tlangpuite:

(1) Committee pawlho Hming; A hun; A hmun; Kaihruaitu (chairman) hming; member kalte hming emaw, a zat emaw, Hunserh hmangtu leh hman dante ziah tur a ni.

(2) Rorel hmain chairman-in committee a koh chhan emaw, thuhma emaw, a sawite chu tawi kim taka ziah luh tur a ni. Abiktakin Emergency Meeting-ah chuan ziah ngei nise a tha awm e.

(3) Hunserh (devotion) hmangtu hming leh a Bible chang chhiar bung leh chang te, a hla thlan number-te, a thu sawi (fuihna) tlangpuite chu tawi kim taka ziah luh tur a ni.

(4) President report emaw, secretary report emaw, midang report a awm chuan tawi kim takin a thu tlangpui (summary) hriat theih tura ziah luh bawk tur a ni.

(5) Sum vawngtu (Treasurer) hnen atanga sum dinhmun report pangngai (endiktute endikna awm lo) chu, "Treasurer hnen atangin sum dinhmun report kan ngaithla" tiin a tawk a, kan sum neih zat a number-a ziah luh a tul lem lo (kan ziak lut anih pawn a sualna viau erawh a awm lo). Pawl ho thlan sum endiktu (convener) hnen atanga sum report kan ngaithla anih erawh chuan kan sum neih zat number-a ziah tur a ni.

(6) Vote chhiartute hi tarlan ngei tur a ni a, volunteer a inpe an nih chuan “inpe” tia tarlan ngei tur a ni.

(7) Agenda-a lo lut rorelte chu number hrang hrang peka ziah tur a ni.

(8) Number pek danah hian chi hrang hrang a awm a, Thesis ziah dan emaw, Synopsis ziah dan emaw a puitling taka pek kher a ngai lova, (1 2 3) a pek hi a tawk viau awm e. Sub-point a awm anih chuan (a b c) a pek leh mai tur a ni. Mi thenkhat chuan Roman number pawh an hmang tho.

(9) Committee member-te zingah thu inchuh a awmin an tawngkam te chu tarlan tur a ni lo a, banphara an nemngheh thutlukna chauh ziah luh tur a ni.

(10) Pawlho hnathawktu (post) hawn anih a, interview chhang pahnih (2) aia tam an awm chuan an hming tarlan vek tur a ni a, Journal Secretary kan neih loh chuan an vote hmuh zat pawh tarlan ngei tur a ni.

            A chunga kan sawi tawh angin he article kan chhiar atang hlawkna emaw, hmasawnna chi khat tal kan hmu anih chuan a ziaktu ziah chhan chu tih hlawhtlin a ni ngei ang. In siamthat ngaite insiam tha ngam ila, kan hriat ngai loh pahnih khat a lo awm a nih pawhin kan nunah i seng lut ang u. Mi inzir mi leh mi fing chuan mi nun atang leh a lehkha chhiar atang hian thil tam tak a zir chhuak fo thin a, mi a erawh chuan a thil tawn atang chuah a zir thin. Chhiartu zawng zawngte Lalpan malsawm che u rawh se.