Buh lem leh buh tak tehkhin thu

Alex Lalagent Thanga

Buh lem leh buh tak tehkhin thu hian engnge min zirtir?

Buh lem tehkhin thu hi Mathaia 13: 24-30 ah kan hmu a, Lal Isua hrilhfiahna ngei pawh chang 36-43 ah kan hmu. He tehkhin thu hian tlarau lam thil sawitum thuk tak a nei a, Bible-ah a hrilhfiahna awm reng si hian thuhriltu tam tak te'n kan hrilhfiah dik lo fo. Lal Isuan tehkhin thu a sawi zawng zawngte hi a zirtirte a hrilhfiah vek bik lova, he tehkhin thu erawh chu a zirtirte'n an zawh nawn kher avangin a hrilhfiah ta a ni. 

*Chi tha (buh chi) thehtu chu Mihring Fapa a ni a; 

*lo (field) chu khawvel hi a ni (mi thenkhat chuan lo hi kohhran-ah an hmehbela, tunlai kohhran member-te kan en chuan, an pianthar vek bik loh avangin a dikna chin pawh a awm ve thei bawk);

*chi thate chu ram fate (Pathian ram fate, ringtute) an ni a (mi tamtakin chi tha hi Pathian thu angin kan hrilhfiah a, hei hi phuahchawp hrilhfiahna a ni, Bible-in chiang takin min hrilhfiahsak tawh, buh chi thehtu tehkhin thu (Mathaia 13: 1-9) nen hriatfin loh tur); 

*buh lemte chu mi sual fate, ring lo mite an ni a; 

*hmelma pa chu Diabola a ni a; 

*buh seng hun chu khawvel tawpna tur a ni (Hei hi mi thianghlim lawr hnu, kum 7 harsatna tawp lam, ring lo mite tana Pathian rorelna lo awm tur sawina a ni a, tribulation-a piangthar, ringtute erawh chu rorelnaah lak chohvin an awm ve lo anga, Lal Isua lo kallehna leh kum 1,000 rorelna nghakin leiah an awm ang);

*buh attute chu vantirhlohte an ni anga, Diabola leh a hnungzuite, leh ring lo mite chu meipui, tah leh ha thialnaah an paih lut tawh ang. Mi felte (ringtute) erawh chu Pa Pathian Lalramah ni angin kan eng tawh ang. 

Nula Thianghlim Fapa, Lal Isua

Lal Isua nula thianghlim fapa a nihna 

Alex Lalagent Thanga 

#Engvang nge Lal Isua kha nula thianghlim fapa a nih kher kher a tul/ pawimawh?

            Lal Isua, nula thianghlim fapa anihna hi Christian-te thurin pawimawh ber te zinga mi leh thurin laimu pakhat a ni a, Bible pawhin min hrilh chiang em em a ni (Isia 7:14, Mathaia 1:23, Luke 1:27, 34). A hmasaberah chuan, Mari zawhna, "Chung chu engtin nge ni ang?" (Luka 1:34) kha Gabriela chuan, "Thlarau Thianghlim i chungah a lo thleng ang a, Chungnungbera thiltihtheihnain a hliahkhuh ang che; chuvangin, mi thianghlim lo  piang tur pawh chu Pathian Fapa an ti ang," (Luka 1:35) tiin a chhang a.Chu mai pawh a ni lo, Josepha hnenah pawh, " I nupui hual Mari chu neih hlau suh; a nau pai chu Thlarau Thianghlim lak mi a ni asin," a tih te, leh tirhkoh Paula'n Galatia 4:4-ah, "Pathianin a Fapa, hmeichhe hrin,... a tir chhuak ta a," a tih te hi thu pawimawh tak te an ni.

            A chunga Bible chang tarlan atang te khian Lal Isua chu Mari taksa kaltlanga Thlarau Thianghlim fa a nih zia kan hmu a, Thlarau Thianghlim tel lovin Mari chauh chuan a hring thei lova, bungbel (hmanrua)ah a rawn hmang chauh zawk a ni. Pathian chauhvin Thu tisaa channa (incarnation) hi a ti thei. Engpawh nisela, he mi avang hian Lal Isua mihrinna (humanity) leh Pathianna (deity) hnawl tamtak an awm ve leh bawka, Bible erawh chuan 'mihring zaah za, Pathian zaah za' tiin min hrilh chiang hle (Johana 1:14, I Timothea 3:16, Heb. 2:14-17). Pianpui sual hi chi inthlah chhawng atanga kan dawn a ni a (Rom 5:12, 17, 19), hei vang tak hian alawm Josepha chi tel lova a rawn pian! Thlarau Thianghlim fa anih tlat avangin pianpui sual pawh a neih loh thu kan hmu (Heb. 7:26). Nula Thianghlim Fa anihna a pawimawh zia chu:

(1) Pianpui sual nei lo turin or Pianpui sual neihna (chi inthlahchhawnna) a rawn hel (circumvent)

(2) Chatuan Pathian mihring (tisa) ah a lo changa thisena inthawina famkim min siamsak ta a ni. 

Tunge mi dek?

Alex Lalagent Thanga

Hmeichhe thiputin Isua a deh khan engvang nge, "Tunge mi dek?' ti a, Isuan a zawh?

Lal Isuan engkim a hre lo em ni?

            "Tin, Isua chuan a chhung ata thiltihtheihna chhuak thin chu a chhuak tih a lo hria a, mipui ziangah chuan a hawi vel ta nghal a,'tunge ka puante dek kha?a ti a (Marka 5:30).

            Mathaia 9:4 leh Mathaia 12:25-ah Lal Isuan mi ngaihtuahna te a hriat fai vek thu kan hmu a; chu mai pawh a ni lo, vawi khatmah a la hmuh ngai loh leh mihring lam atanga a la hriat ngaih loh, theipui hnuaia awm, Nathanaela a hria a (Johana 1:48), Zakaia a hre bawka (Luka 19:9),etc., chuvangin, Engkim hretu (omniscient) Lal Isua hian, engvang nge zawhna a siam kher kher tih hi zawhna pawimawh tak a ni. Lal Isuan zawhna a siam chhan chu:

(1) A damna chhan hrilh turin a ko chhuak. Chuvangin, "Ka fanu, i rinna hi i dampui a ni e," (Marka 5:34) a ti a. Hmeichhe thiputin a thiltih a chhuan theih lohna tur leh a thiltih avanga dam (chhandam) a nih loh zia te, a rinna avang chauhva dam a nih thu hrilh a tum vang zawk a ni. Chu tiang bawkin, keini ringtute pawh kan thiltih avanga chhandam ni lovin rinna avang chauhva khawngaiha chhandam kan ni (Ephesi 2:8). 

(2) Testimony sawi turin a ko chhuak. Mathaia 10:33-ah chuan, "Tu pawh mi hmaa mi phat apiang, ka Pa vana mi hmaah ka phat ve ang," a ti a, Luka 9:26-ah chuan, "zahpui" tih tawngkam a hmang. Lal Isua khan hmeichhe thiput kha a hriat loh vang ni lovin mite hmaah Pathian ropui zia puangchhuak turin a ko chhuak a ni.