KOHHRAN ZIRTIRNA DIK LO

Alex Lalagent Thanga

          Kohhran chu englai pawhin, khawi hmunah pawh dovin a awm thina, dotu lian ber chu hmelmapa, Setana a ni. A hlawhtlinna lian ber leh a hmanrua tangkai ber pakhat chu zirtirna dik lo hi a ni. Kohhrante kan invenna tura zirtirna dik lo lian zual (5)te lo thlir dawn ta ila:

(1) Rinna kawnga zirtirna dik lo (Heretic)

Hei hi zirtirna dik lo zawng zawnga hlauhawm ber leh langsar ber, mite thinlung hneh awlsam em em a ni a, kristiante thurin laimu, Lal Isua chu nula thianghlim fa a nihna te, Lal Isua Pathianna te, a mihrinna te, mi zawng zawng aia Lal Isua thihna te, Lal Isua thawhlehna te, Thlarau Thianghlim pathianna leh mi nung (person) a nihna te leh, kan Pathian chu thumkawp Pathian (Trinity) a nihna te a hnawl a. Heng mite hi Bible pawhin chiang takin a lo sawi ve bawk. “Nimahsela, mite zingah chuan zawlnei derte pawh an lo chhuah kha, chutiangin in zingah pawh zirtirtu derte an la awm ang, anni chuan anmahni leitu Lalpa meuh chu phatsanin, mi tichhe thei rin hrannate a rukin an rawn luhpui ang a, mahni chungah chawplehchilha boralna an thlentir ang” (2 Peter 2:1).

(2) Thusawi/ tawngkam thiamna ngawt (Charlatan)

Heng mite hi mahni tanghma sial rawngbawltu, berampu, hruaitu, zirtirtute an ni tlangpui. Christianna chu hausakna, mimal hamthatna, chhungkua nun nawmna leh, kohhran leh mipuite hnen atang engzat pawh lak pawisa lo, sum bawiha tang, van lam thil aia khawvel thil thlahlelte an ni a, englai mahin duh tawk chin an nei lo. Bible chuan, “… Pathian ngaihsak hi hlawkna titute an ni” (1 Timothea 6:5) a ti.

(3) Zawlnei derte (False Prophets)

Bible bu 66-a Pathian Thupuanchhuah duh tawk lovin, Pathian hnen atang direct-a thu thar emaw, inlarna emaw dawn tum tlat an ni a, Lal Isua lokallehna hun leh ni tur pawh vawi engzat tak hrillawk tawh ang maw? Pathinin mihringte hriat tur pawimawh chu Bible-ah min hrilh vek tawha, mihring chu engkima ramri nei leh tawp chin nei a nih avangin engkim chu a hre thei lo hrim hrim. Chu tak chu min Siamtu Pathian nena kan danglamna pawh a ni. Hla siamtu lo sawi angin, ‘A then pawh kan hre thei lo’ a, chutih laiin mipuite bengverh tak thlarau danglam tak lo dawng an awm ve zela, Bible erawh chuan, “Unaute u, thlarau nazawng ring suh u; amaherawhchu, thlaraute chu Pathian laka mi an ni nge ni lo fiah rawh u; thuhriltu der tam tak khawvelah an lo chhuah tak avangin” (1 Johana 4:1) tiin fimkhur turin min fuih ve bawk.

(4) Thuneihna a dik lo zawnga hmangte (Abusers)

Hmangaihna nena rawngbawlna luhchilh tak tak lam aiin mipuite thawhhona leh thawhrimna atanga ropuina, chawimawina leh, hmingthanna dawn nuam an ti a, mi dangte an sawichhiatna phenah mahni an inchawisang fo. Heng mite hian leadership an chelh chuan an nihnain a ken tel thuneihna chu a dik lo zawngin an hmang a, chaltlai taka hruaitu nih te, mahni thu chauh kalpui ngut ngut te, sum leh pai leh, hmeichhiat mipatnaah pawh an fihlim lo thin. “Chung chu Pathian ngaihsak lo mite an ni a, kan Pathian khawngaihna chu hurnaah an chantir a” (Juda 4).

(5) Tidarhtu (Divider)

Lal Isua min pek, inpumkhatna lam aiin ringtute mawng hawlha, mi kut kaltlanga rul man tum tlat, mahni inti fing tak siin hmai hnih nei, thurin leh ngaihdan fumfe nei lo, a tualthu a zira danglam thei, thli chhem len ang mai mai an ni. Ringtu pahnih emaw pahnih aia tam thu khat vuaa an tanrual chuan an thiltihtheihna a insawrkhawm a, Setana’n a hnen thei thin lo. Chu tak chu hriain, ringtute mi tidarh a, ‘Tanrual hi chakna’ tih hre reng mahse, chhungril takin kan inngaih lova, kan lungrual chuang lova, kan tangrual thei lo. “Chung mite chu tisa mi, Thlarau nei lo, pawl hrangte siamtu chu a ni” (Juda 19).