Eng vang nge Lal Isua a thih?

                 Alex Lalagent Thanga  

Lal Isua krawsa a thih khan ringtu te zawng zawng ama rualin kan thi ve tih hi Tirhkoh Paula hnena Pathian inpuanna leh Pathian thutak a ni a (2 Kor. 5:14), he thutak ropui hi Rome khua mite, Korinth khua mite leh Galatia khua mite hnenah a sawi mawlh mawlh a, “Krista hnenah khenbeh in ka awm ta,” (Galatia 2:20), “Mi zawng zawng thih aiin mi pakhat a thi a,” (2 Kor. 5:14). He thutak danglam tak leh ropui tak mai hi Petera, Johan leh Jacoba te chuan engmah an ziak lang lova, Tirkoh Paula hnena Pathian inpuanna danglam bik te pawh a ni thei awm e. Lal Isua a thi a, a thawhlehna chu Pathian mitah chuan ringtu te thihna leh thawhlehna a lo ni ta a; Lal Isua tuhala kross-a a au khan a rilruah nang leh kei kan awm a sin. Chuvang chuan mahni tana nung tur kan ni tawh lova, amah (Krista) tana nung tur kan lo ni zawk (2 Kor. 2:15).

            Ringtu ka ni, ti a inchhal te zawng zawng hi, “Eng vangnge Isua a thih?” tiin han inzawt ta ila, mi tam zawk chuan “Kan sual te avangin a thi (1 Kor. 15:3)” tiin kan chhangngei ang. Kan chhan dan tur reng pawh a ni a, amaherawh chu Tirhkoh Paula vekin ti hian a lo sawi leh bawk, “ Tin, a nung leh te chu mahni tana nun tawh lohva, a thih ai a thi a tholeha tan chuan an nun tawh zawkna turin a ni mi zawng zawng thih aiin a thih ni” (2 Kor. 5;15). Lal Isua hi kan sual te avang chuahvin a thi lova, ama tana kan nun theih nan a thi a ni tih hi I hre thar leh bawk ang u. Lal Isua thih chhan leh keimah ni kal tlanga Pathian thil tum kan hriat chian hian sual lamah ke kan pen thei tawh lova, nitin mahni invui liamin Lalpa tan kan nung thin. Setana thiltum ber chu Pathian thutak varpawh (hmu) thei lo tura kan thlarau mit tihdel hi a ni a, ringtu tam tak te chuan Lal Isua ka ai a thi, tih kan hria a, ama tana nung tur erawh chuan ke kan pen ngam lo thin hi a pawi hle.

            1 Kor. 15:3 leh 2 Kor. 5:15 hi han dah tlang chiah la, sual lo chhuahna bulpui (hram) ber chu “Keima mihrinna or chapona” (self-centredness) tihhi I lo hmu chhuak ve mai ang. Keimah ni tana kan nung chhung hi chuan sual lakah hnehna nun kan nei thei lo anga, kan tanwgka chhuak leh kan chet ziaah Krista hmel a lang thei lo vang. 

            Chuvang chuan ringtu tam zawk te hi chuan 2 Kor. 5:15 hi kan kal kan a, bung 5:17 ah kan zuang thla leh tawp thin, “… thil siam thar a lo ni a, thil hlui te chu a ral ta a; ngai the u, a lo thar ta.” Eng nge thil hlui te chu? Eng te nge ral tura chu? Eng te nge khenbeh tura chu? Kan thiltum (goal) te chu a lo thar ta em le?