“TIRHKOH” awmzia zirchianna

Alex Lalagent Thanga 

Tirhkoh (apostle) TITLE hi MMC/F in kan hmang tih ka hriat atang khan ka rilruah a lian em em a, amaherawh chu Theology nena inkungkaih anih avangin han sawi vak pawh a nuam lo hle, a chhan (meaning) leh a tum (purpose) erawh kan hriat a tha hle ang, tiin ka han ziak ve ta mai a ni. Tu huat kan sawi em lo’ng chu maw!

            Apostol/ Tirhkoh tia kan hman ve tak hi Greek “Apostelos” tih atanga lakchhawn a ni a, a awmzia chu “Pathianin thu sawi tur a pekte sawi tura tirh” tihna a ni. LXX (Septugint) ah phei chuan Pathian hnen atanga thuneihna dawng, Pathian tirh ngei an nihna tarlan a ni nghe nghe. Thuthlung Hlui-ah chuan Pathian thuneihna keng chung leh Pathian tirh avanga chhuak an nihna lantir a ni tlangpui bawk. 

            Apostol/ Tirhkoh tia kohtheihte hi Bible min zirtir dan angin han zir chiang dawn ta ila, Thuthlung Thar-ah chuan “Lal Isua zirtir sawm leh pahnihte” (Mat. 10:2, Mk 3:14, Lk 6:13) bakah Paula leh Barnaba pawh Apostol tia koh an ni ve bawk (Tk 9:1-6, 1 Kor. 9:1, Tk. 14:14). A chhan ni a lang chu (1) Lal Isuan a koh ngeite, (2) Lal Isua mit ngeia hmutute a huam deuh ber awm e. Tirhkoh tia koh theih te hi Lal Isua rawngbawlna leh thawhlehna mit ngeia hmutute a kawh deuh bik a vangin, duh duha TITLE inpek mai pawh hi a tha viauin a lang lo a ni. Tirhkoh tia invuah hi tul nise chuan Kohhran hmasa hruaitute leh Kohhran pate (Church Fathers) khan an invuah furin a rinawm. Kum zabi 14-na lai vel atang khan Tirhkoh aiah a tlukpui “Missionary” tih hman chhoh a lo ni ta a, hei hi a tha hlein a lang. Ama’rawhchu Lal Isua Lal leh Chhandamtua pawm apiangte chu a tulna hmuna Pathian ram dinchhuah hi Lal Isua thiltum a ni a, Chanchin Tha hril tura thupek an ni. Kohhran Chanchin Tha hril ngaisang lo leh ngaihsak lo chuan rawp lam a pan tial tial ang a, a thi ngei dawn a ni. Tui luang lo chu a bawlhhlawh a, tlan tlak a ni lo angina, Kohhran pawh a luan chhuah loh chuan ringtu leh khawvel mite tan in tlak a awm lo vang.