Sawisel turin tunge I nih?

Sawisel turin tunge I nih?

Alex Lalagent Thanga  

            “Sawisel suh u, sawisela inawm loh nan. In sawisel ang bawkin an sawisel ang che ua, in tehna ngai bawkin an tehsak leh ang che u.” (Mat. 7:1-2)

            Mi sawisel leh tehna hlira khat nunah chuan engkim mai hi a rang tial vek a, chu chu engvang nge tih chuan kan tukverh hi a rang tial (bal) tihna a ni. Mite nunah thil tha lo chiah hmuh I tum thin avangin thil tha I hmu thei lova, huatna, itsikna, thinurna leh khaknain mi I thlir thin a, chu chuan I nunah lungawina reng a thlen thei lo che a ni.

            Nupa tuak khat hi veng pakhatah an insawn a. Vawi khat chu tukthuan an ei laiin an nu chuan an thenawmnuin thuamhnaw a suk a zar lai chu tukverh atangin a hmu a. A thenawmnu thuamhnaw suk chu fai lo em emin a hria a, a pasal hnenah chuan, “Saw nu sawn puan suk dan leh sahbawn hman dan pawh a thiam lo anih dawn saw. A thuamhnaw suk a van fai lo em em,” a ti a. Rei tak an awm hnuah pawh a thenawmnu in thuamhnaw a phochhuah apiangin a pasal hnenah chu chu a sawi fo a. Tuk khat chu a thenawmnu thuamhnaw suk chu a fai ta em em mai a, maktizetin a pasal hnenah, “A tawp a tawpah chuan puansuk dan a thiam ve ta. A thuamhnaw zar pawh a fai ta hle mai,” a ti a. A pasal chuan, “Nu-I, tukin chu ka tho hmaa tukverh darthlalang hi ka nawt fai vek a lawm,” a ti a.

            Chuvangin I thenawmte thuamhnaw suk a fai leh fai loh chu I tukverh darthalang I nawh fai leh fai lohvah thui tak a innghat a ni. Thil reng reng a tha lo lam zawnga thlir thin I nih chuan I kalna apiangah kawng khuar leh chhe lai chauh I hmu thin ang. Chu tiang mi I nih chuan I tukverh darthlalang kha tifai vat turin ka sawm a che. Bible pawhin, “ Mi thianghlimte tan chuan engkim a thianghlim thin; nimahsela, mi bawlhhlawh leh ring lote tan chuan engmah thianghlim reng a awm thin lo, an rilru leh an chhia leh tha hriatna reng pawh a bawlhhlawh tawh a” (Tita 1:15) a ti a ni.

            Mi sawisel kan peih em em chuan an thatna aiin an that lohna kan en thin a ni ngei ang.  Mi thenkhat phei chuan kan thawhpuite that lohna leh tlin lohna kan sawi kan sawi a, hei hian kan inlaichinna leh kan thawhhona a tihlawhchham fo thin. A ruka inerna leh in chotuahna te hian mi pakhat leh pa khat inkarah boruak a tichhe thei bawk a, ti ti phung ngah lutuk reng rengte hian an rinhmang leh dawt tlem an belh fo thin. Mi dangte zar buai chhen lo la, mi dangte buainaah inrawlh bawk hek suh. Mi dangte buaina a inrawlh chingte hi mi sawisel ching an ni thin. An tawngtaisak duh vang che pawh ni lovin thil engkim hi a kip a kawiin hriat kilh kelh an tum a, chu tiang an tih chhan chu sawisel tur leh rel zui tur an zawn vang zawk a ni. Thil tha lo an sawi hmain chhuanlam siam vat la, kalsan thin ang che. Pathian mi hman leh khawvel thlirdan pawha mi ropui leh hruaitu tha, officer liante, Mizo khawvel huapa lehkha ziak thiamte, zai thiamte leh kan mithiam chi hrang hrangte hi mimal takin ka kawm ve nual ta a, mi that lohna sawisel ching tumah an awm lo. Anmahni aia dinhmun sang leh tha a awm thei turin midangte hi an duhsak vek mai a, mi talent hai chhuah dan an thiam em ema, an rilru dik takin thu an sawi bawk thin. Chu chu an hlawhtlinna bul leh mi te ngaihsan an hlawhna pawh a ni ngei ang. Mi fing bula awm chu a nuam a, mi inti fing bula awm erawh chu a hahthlak thin.

            Pa pakhat hian a nupui hnenah artui pakhat kang ro (fry) tur leh pakhat chu a kawi (half-boiled) a kang turin a ti a. a nupui chuan a sawi ang thlap chuan artui chu a kan zawh hnuah thlengin a rawn chhawp a. A pasalin artui a han hmuh chuan lungawi hmel lo zetin a lo en a, a nupui chuan, “Enge ka tih dik loh a awm em ni?” a han tih chuan a pasal chuan, “ A kan ro loh tur zawk I kang ro alawm” a la ti talh a.

            Mi thenkhat chu thil sawisel hi kan chin dawklak tawh avangin mi te nunah hian thil tha reng kan hmu thei tawh lo a, kan sawiselna phenah mahni intarlan kan la tum fo thin. Pathian thiltih aiin an mahni thiltih an tilangsar duha, an tawngkamah Lal Isuan ropuina a chang ngai lo. Heng mi te hi Kross-in a sawizawi loh ringtute an ni a, kawm tam vak loh a tha.

            Chuvangin sawisel tura thlemna a lo thlenin in ngaihtuah harh vat thin la, Lalpa hnenah intulut vat thin ang che. Mi zawng zawng hian tlinlohna kan nei veka, chu mi hmang chuan Setana’n a rawn bei che a ni. Hei hi rilru indona a ni a, mahse zam suh! Lalpa chu I lama tang a ni!!!